Vastelaovend in Zitterd

In dit hoofdsjtök lègge veer oet wie me Vastelaovend viert in Zitterd!

Vastelaovend in vruiger jaore
Van oorsjpròng is Vastelaovend ein Katholiek fees. Lètterlik beteikent 't de aovend dae veuraaf geit aan de Vasten. Vruiger moch me zich pas verklèje op Vastelaoveszòndig nao de Hoogmès. Op zòndigmiddig tròk d'n optoch langs, woonao me de sjtad in ging. Kènjer mochte vruiger nog neit in de kaffee kòmme, dus ginge de kènjer sjprèngend en dansend door de sjtad haer. Vruiger waor op Vastelaovesmaondig de Kènjeroptoch. Dao leipe kènjer achter ein hermenie aan mit ein tuutje sjlòk in de henj, die ze krege biej de opsjtèlling biej de auw sjteinfebrik Aan de Kollerbergerwaeg. Op Vastelaovesdaensdig waor 't Appelsienesjmiete. De appelsienesjmietesj sjmete appelsiene en get apeneutjes oet veur de kènjer. Vruiger waore de appelsienesjmieters sjtreng veur de kènjer, en de kènjer waore dan ouch ein bietje bang.
Op Essjelegounsdig sjtòng me 'sjmòrgesvruig op òm nao de kirk te gaon en ein essjekrutske te haole. Dan begoosj de Vastetied, en veur de kènjer begoosj ouch drek de sjool. Sjlòkke moch me neit pès de Paosje. De sjlòk woort bewaard in ein vastetrummelke die de kènjer òm de nak hauwe. En mit de Paosje oute ze zich misselik aan al dat lekkesj.

De Marotte
De Marotte is de sjtadskarnavalsvereiniging van Zitterd, opgerich in 1881 door lede van auwd Swentibold. De naam kump oet 't Frans en beteikent "gek huidje". De veurzitter van de Marotte wurd ouch waal Vors Marot genuimp. De Marotte zeen ein van de auwdste karnavalsvereiniginge van Nederlandj. Zie organiseiere aktiviteite veur de Zitterder mit de Vastelaovend en in d'n tied die daoaan veuraaf geit. Ouch regele zie alles òmtrent 't keize en begeleije van de sjtadsprins.
De Marotte höbbe internationale kontakte mit De Gross Kölner oet Kölle, De Koekerelle oet Hasselt en de Kangeroes oet Australië.
Hunne optoch is legendaries en internationaal bekènd, mit name òm de prechtige wages.

De Sjtadsprins
Jeder jaor wurd door zittesje sjtadscarnavalsvereiniging De Marotte eine prins gekaoze, dae drie daag lank zal regeiere euver Zitterd. In Zitterd mòt eine Marotteprins jòngk zeen, globaal tösje de 23 en 30 jaor. Hae moug neit getrouwd zeen, mer hae moug waal ein relasie höbbe of zelfs samewone.
Vors Marot geit jeder jaor op zuik nao eine gesjikte kandidaat veur 't prinssjap. `t Mòt eme zeen dae plat sjprik, mekkelik kalt, humor haet, zich goud kènt prizzenteiëre en ummer veurkòmmend nao de luu is. En... hae mòt natuurlik eine gebaore Zitterdenaer zeen!
Es Vors Marot eine sjnaak op 't oug haet dae gesjik zou zeen òm prins te waere, geit hae häöm toes opzuike òm te vraoge of hae prins wilt waere. Es de prins offisjeel gevraog is en jao haet gezag, mòt de aansjtaonde prins ziene mòndj hauwte en neit vertèlle dat hae es prins is oetgekaoze, wat natuurlik neit mekkelik is. De aansjtaonde prins mòt soms zelfs leige, zodat neme in de gaate haet dat hae prins wurt.
De Prins wurt pas bekènd gemaak biej de Oetruipingszitting in jannewarie. De aansjtaonde Prins geit geweun mit zien vrunj (die neit weite dat ze mit ein aansjtaonde Prins te make höbbe) nao de zitting, en vlak veur de oetruiping geit hae weg mit ein sjmoesje. Dan geit de gouwe jòng heivisj òm te wachte pès de zitting is aafgeloupe en de bezuikesj kòmme òm de nuuje prins te filleseteiere.
Daags nao de oetruiping mòt de nuuje prins al vruig oet de vaere òm klaor te sjtaon veur de offesjele fillesetaties.
Hermenië, kepelkes, vastelaovesvereineginge, vastelaovesgekke, en femieje en bekènde van de prins. Zien hoes is gans verseiërd en ouch zien buurt.
`t Prinsepak en mötsj en attrebute krig hae pas aan oppe installatiezitting. Dan wurt de prins van veurig jaor "geplök" -de attrebute waere häöm aafgenòmme en hae wurt opgenòmme bie de auwd-prinse- en krig de nuuje Prins de ganse kraom òmgehange.
Dan begint ein drökke tied veur de Prins; Hae trèk mit in optochte, geit op bezuik bie basissjole, bejaardetehoeze en ziekenhoeze en bezuik alle evenemènte die mit de Vastelaovend in Zitterd te make höbbe.
Me kènt dan ouch aannumme dat nao de Vastelaovend de prins muig mer voldaon zal zeen.

De Pappegey
De Pappegey is 't jaorlikse liefblaad van de Marotte, dat twee waeke veur de Vastelaovend verkoch wurt.
In de Pappegey sjaon leuke en humoristiese verhäólkes en foto's van wat bekènde en minder bekènde Zitterdenaere aafgeloupe jaor zoal höbbe mitgemaak. De marotteprins en zien femieje waere natuurlik 't meis op de hak genòmme.
Es me eine bekènde, vrundj of femiejelid haet dae get leuks haet belaef, of get geks of sjtòms haet gedaon, kènt me vanaaf `t naojaor ein verhäölke euver 't gebeurde insjikke veur in de Pappegey.
Jederein in Zitterd is jeder jaor nuusjierig òm de Pappegey te laeze. En dan maar d`r achter prebeiere te komme wae dich d'rin haet gezat!

Zòndig veur Vastelaovend: Kènjeroptoch
Op de lèste zòndig veur Vastelaovend trèk in Zitterd de Kènjeroptoch door de sjtraote. Dees begint òm 13.33. Kènjer kènne zich allein of in gruupkes van teveure opgaeve òm mit te doon. Buurtvereiniginge en sjole doon mit, mer ouch köppelkes en einzelgängers. Jederein dae mitdeit krig ein medaaje, en ein sjurie bepaalt wae in jeder Categorie de Erewimpel wènt en dus mit moug doon aan de Grote Optoch op Vastelaoveszòndig.

Dònderdig veur Vastelaovend: Awwieverbal
Mit 't Awwieverbal gaon de mechelkes 's aoves verkleid es awt wief op sjtap zònger mansluu, ònherkènbaar gesjmink of mit maske op. Zònger dat de mansluu 't weite, doon de maedjes zich sjtikkem hun tòntjtele òm en aan en vertrèkke nao de sjtad. Laater oppe aovend gaon de mansluuj hun maedjes achternao en laote ze zich sjlachte (neit aafsjlachte, dat is gans get angesj) Dat wilt zègge, dat ein auwt wief de manskael, eine bekènde van hun, op ein fien meneiér ze de waorheid zaet en veur de gek hiltj.De bedoeling is, dat de mansluuj `t sjportief opvatte en op ein leuke meneier dao-op ingaon.
Dèks haet de manskael neit in de gaate dat zien eige leifste mechelke veur häöm sjteit, en häör sjtöm verdreet òm neit herkènd te waere. Mer 't kump ouch veur dat ze ein vraem jònk mechelke oppe sjoot höbbe zitte!

Vastelaoveszaoterdig: 't Kanòn van 't Balkòn
't Kanòn van 't Balkòn is ein vrie nuu tradiese (òntsjtange in 2003) in Zitterd, mer waal al ein gevestigd evenemènt. Dit evenemènt vèndj plaatsj op Vastelaoveszaoterdig oppe Mert in Zitterd, vanaaf 19.11 oere tot wied nao middernach en wurd georganiseierd door 't Trumke en 't Troötje. Vanaaf `t balkòn van Hotel De Limbourg traë bekènde Limburgse (vastelaoves-)artieste op. Òm 11.11 oere 's-aoves wurd confetti door ein kanòn aafgesjaote, nao de luu toe. Nao 't aafsjeite van 't kanon kènt `t fees dan definitief beginne!!!

Vastelaoveszòndig: Grote Optoch in Zitterd
Op Vastelaoveszòndig trèk vanaaf 13.33 de Grote Optoch door de sjtraote van Zitterd. Me kènt zich van teveure opgaeve òm allein, in köppelkes of in gruupkes mit te doon. 't Motto mòt van teveure waere goudgekeurd, òm te veurkòmme dat d'r beledigende of sjandalige dènger in d'n optoch gebeure.
De Grote Optoch in Zitterd sjteit bekènd òm häör prechtige waages. Dees waages waere euver 't algemein geboed in de Optochhal, ein proces van waeke en soms zelfs maonje.
In de Grote Optoch zeen versjillende prieze te wènne. De belangriekste hievan is de Wil Heuts-trofee.

Vastelaovesmaondig: Laammaekesjkonsaer en Träötekonkoer
Veur de vruige vogels begint op Vastelaovesmaondig òm 13.11 oere't Laammaekesjkonsaer in Café De Vaan, georganiseierd door de Marottekapel.
Òm 14.44 oere begint dan 't träötekonkoer. Zaate hermeniekes oet Zitterd en òmsjtreke sjpele dan op versjillende lokasies in de bènnesjtad van Zitterd: De Mert, De Zittesje Sjnaak en de Sjtadspòmp. Tössje 18.30 en 20.00 oere krig me de gelaegenheid òm de inwènjige minsj te versjterke, wonao de aovend-edise begint ,die doert tot 22.00 oere.

Vastelaovesdaensdig: Appelsienesjmiete en Maske Begrave
Op Vastelaovesdaensdig begint òm 14.11 oere 't Appelsienesjmiete in de bènnesjtad van Zitterd. Appelsienesjmietesj sjmiete, in karakteristieke outfit gekleid, appelsiene oet veur de kènjer, die prebeiere de appelsiene te vange. De kènjer mòtte "Appelsiene! Appelsiene!" roupe òm de Appelsienesjmietesj te laote weite dat ze mòtte sjmiete.
Òm 12 oere middernach (verzamele 23.11) vertrèk vanaaf de Mert de rouwsjtoet van 't Maske Begrave, georganiseierd door De Mander. In ein plechtige sjtoet wurt ein maske nao de Kolleberg gedrage. Dao wurt nog ein plechtige -en zeer humoristiese- graafrede gehawte, woonao 't Maske begrave wurt en de Vastelaovend offisjeel is aafgeloupe en de Vaste is begoosj.

Esjelegounsdig: Esjekrutske haole en Heeringbiete
Op Essjelegounsdig gaon väöl luu -natuurlik neit verkleid mer in geweun alledaagse kleier- nao de aovendmès òm ein Essjekrutske te haole. Nao de mès is in de kaffees van Zitterd Heeringbiete. De vastelaovesmeziek sjteit zach aan en me kènt behawve drènke ouch hering kriege in de kaffees.