Uniform van de Appelsieneklup
De leede van de Appelsieneklup drage allemaol ein uniform.
Dit zeen de òngerdeile van dat uniform:
|
De daomino
De daomino is ein langk zjwart gewaad mit ein kapesjon d`r aan vas en wurt meistal van glanzend sjtòf of
van ketoene sjtòf gemaak.De daomino wurt van vruiger jaore haer gedrage door de appelsienesjmieter.
|
De appelsienezak
De appelsienezak wurd gedrage euver de daomino en deint òm de appelsiene in te doon die later gesjmete gaon waere.
De appelsienezak mòt goud vaszitte òm de taille en tweemaol sjtevig waere vasgeknuip. Taegeweurdig zuut me ouch
ummer dèkser sjouwer-modelle.Van oorsjpròng oet is de appelsienezak gemaak van sjtevige gerdienesjtòf. De zak mòt
aan de veurkantj get leger hange es aan de achterkantj, zodat de appelsienesjmieter goud de appelsiene kènt d`roet kènt pakke.
|
't Maske
Vruiger woord door de appelsienesjmieter ummer ein maske gedrage, mer al jaore mòt me die maskesdragesj mit eine pitsjlamp zuike.
Taegeweurdig zeen de meiste appelsienesjmietesj gesjmink in plaatsj van mit ein maske op.
|
De medaaje
Veur zo wied bekènd is de Appelsieneklup de einige vereiniging mit ein eigen, unieke appelsienemedaaje. Oos appelsienemedaaje is
òntwòrpe door Luc "Kleine Luc", "Luc van de Sjtaase", "Rooie Luc" Laudy in 1988, ’t jaor woin oos lid Roel Cobben
prins waar.
Oppe reseptie van Prins Roel II haet de toemalige veurzitter Jo "Haarie" Laudy de medaaje ómgehange bie ziene hoogheid.
Daonao haet de toenmalige sjtadsprins bie de angere lede van de appelsieneklup de appelsienemedaaje ómgehange.
In 1988 haet Teioo medaajes biegemaak mit hulp van zien dochter Resie.
De medaaje is perseunlijk, ze moug neit zomaar doorgegaeve waere aan angere.
Ze moug allein gedrage waere door daegeine dae ze offisiëel ómgehange haet gekrege door de veurzitter van de Appelsieneklup.
De nuuj medaajes waere door de veurzitter Teioo ein paar daag op prouf gedrage òm ze oet te prebeiëre.
Hae sjmit den oug aaf en toe mit ein appelsien, en drènk zich daobie ein glaeske beiër.
|
Anger òngerdeile
D'r zeen nog anger òngerdeile die vruiger bie de outfit van eine appelsienesjmieter heurde. Ich nuim de paeperkouk en de verkesblaos.
Gans vruiger sjtòng op jedere houk in de sjtad eme verkleid, mit maske op en mit de paeperkouk in de henj.
Vruntjelik vroug hae of ze èns d`r in wille biete. Taegeweurdig wurd dit oet hygieniese euverwaeginge neit mee gedaon.
Vruiger hauw eine appelsienesjmieter ouch ein verkesblaos bie zich. Bie 't sjlachte van ein verke, woord de verkesblaos mit
ein reitje opgeblaoze en te dreuge gehange.Es eme dan get te vrech waor bie 't appelsienevange, den kreeg dae ein paar tikskes
mit de verkesblaos. Lang veur de oprichting van Greenpeace (Grien-pies) waor de verkesblaos al in ònbroek geraak es òngerdeil
van eine appelsienesjmietesj-outfit.
Euverigens wurd d'r mit de vastelaovend nog ummer väöl gesjlach, mer det hart niks mit ein verke te make.
Bie 't opbrènge van Prins Roel Cobben höbbe veer, es verwiezing nao Appelsienesjmiete in vruiger jaore, nog verkesblaoze gebroek.
Die höbbe doe bie Jo (Haarie) en Sophie aan de wesjlien gehange.
Zowie geer zuut kènt me òngersjeid make tössje ein traditionele appelsienesjmieters-outfit en ein moderne versie daovan.
Taegeweurdig haet jedere sjmieter ein bietje ziene eige sjtiel, al is de daomino, de appelsienezak en de medaaje nog ummer vas òngerdeil.
|
