Poëzie Appelsieneklup

Hie vèndj geer alle poëzie die ooit is gesjreve euver de Appelsieneklup!

Appelsienesjmiete 2001

Appelsienesjmiete 2000

Appelsienesjmiete 1999

Appelsienesjmiete 1998

Appelsienesjmiete 1997

Appelsienesjmiete 1996

Appelsienesjmiete 1995

Appelsienesjmiete 1994

Appelsienesjmiete 1993

Appelsienesjmiete 1993 (2)

Zitterd, 27 fibberwarie 2001

Oppe mert zuus te ze vleige!!

Appelsiene- appelsiene
  Die vleige vanmiddig in ’t ròndj
In Zitterd de Marottesjtad
  Daovan doon ich uch noe kòndj.

Oppe mert zuus te ze vleige
  En door de ganse bènnesjtad
Det zeen lekkere appelsiene
  Ich vermein- geer wós dat.

Kóm èns kieke- kóm èns vange!!

Dees auw Zittesje tradiese
  Hauwt ich oug al lang in sjtandj
Same mit mien appelsiene-vrunj
  Höbbe veer daomit eine bandj.

Kóm èns kieke- kóm èns vange
  Daovan krit geer geine sjpiet
Geer krit den ein appelsinke
  En ich bön dem lekker kwiet.

Sukses mit vange en de kómplemènte van
  Teioo en zien appelsienevrunj

Zitterd, 9 meert 2000

Ein gebeurtenis- lang niet mis!!

In Zitterd al jaore ein tradiese
  Es ’t vastelaoves-daensdig is
Dat appelsiene waere gesjmete
  Ein gebeurtenis- lang niet mis.

Dat veer al heel lang besjtaon
  Det höb ich uch dèkser vertèld
Dao zal ich ’t niet euver höbbe
  Det is bie deze dan vermèldj.

Vanmiddig gaef ich häöm eine lel!!

Es veer ós vanmiddig zeen
  En geer “appelsiene” ruip heel hel
Den zal ich zeker nao uch sjmiete
  Want den gaef ich häöm eine lel.

Gaot vanmiddig den oug kieke
  Det rao ich uch bie deze aan
Want ’t is toch get bezunjesj
  Daoveur sjtaek ich oet de vaan!

Sukses mit vange en de kómplemènte van
  Teioo en zien appelsienevrunj.

Zitterd, 18 fibberwari 1999

Get mit ein oranje kleur!!!

Luuj ich gaon uch get vertèlle
  Get mit ein oranje kleur
Waat vandaag weiër geit gebeure
  Ich vertèl uch det noe heur.

Vandaag op vastelaoves-daensdig
  Vleige appelsiene door de sjtad!
Geer mòt die prebeiëre te vange!
  Ze zeen veur niks !!! wós geer dat ?

Vandaag is get bezunjesj!!

Mer vandaag is get bezunjesj
  Zaet de sjriever van dit gedich
Mit mich sjmiete de drie bielemen
  Det wilt geer toch zeen- allich.

Kòm vanmiddig den oug kieke
  Sjmiete kènne veer heel fien
Het zal uch zeker gaon bevalle
  Es geer vangt ein appelsien.

Sukses mit vange en de kòmplemènte van
  Teioo en zien appelsienevrunj.

Zitterd, 24 fibberwari 1998

Vanmiddig geit ‘t weiër gebeure!!

Wilt geer èns get sjoons belaeve?
  Luuj van Zitterd zeet alert
Vanmiddig geit ’t weiër gebeure
  Op en róndjelòm de mert.

Appelsiene waere den oetgesjmete
  Door maskes in eine daomino
De luuj mótte ze den zeen te vange
  Want ze kriege ze zomèr kedo.

De dartigste maol!!

Saer neugeteen-neuge=en-zestig
  Sjmiete veer al in de sjtad
Det is al de dartigste maol
  Heel get kere toch zeen dat.

Kóm vanmiddig mer éns vange
  Want det heurt der den oug bie
Mit ein lekker appelsingke
  Maak ich uch den zeker blie.

Sukses mit vange en de kòmplemente van
  Teioo en zien appelsienevrunj.

Zitterd, 11 fibberwari 1997

Zitterd geit get belaeve!!

Zitterd, ein sjtad van tradieses
 Geit vandaag weiër get belaeve
Vandaag, op vastelaoves-daensdig
 Gaon veer ‘m eine laepel gaeve.

Vandaag gaon veer weiër sjmiete
 Mit appelsiene nao de luuj.
Die mótte ze prebeiëre te vange
 Want det is de bedoeling huuj.

Vanaaf neugeteen-neugeënsestig!!

Veer sjmiete hie al heel get jaore
 In neuge-en-sestig de eesjte maol
Heel get jaor is det gelee
 Veur ós is det ein lank verhaol.

Gaot vanmiddig noe éns kieke
 Geer zalt höbbe geine sjpiet
Want veer kénne heel goud sjmiete
 Es ’t zeen mót- heel erg wied.

Sukses mit vange en de kòmpleménte van
 Teioo en zie appelsienevrunj.

Zitterd, 20 fibberwarie 1996

Vandaag geit ’t weiër gebeure!!!

Luuj van Zitterd en òmgaeving
  Loester èns aeve noe nao mich
Vandaag geit weiër get gebeure
  Woo ich mich lang op höb gesjpich.

Vandaag , op vastelaoves-daensdig
  Sjmiet veer appelsiene in de sjtad
Dees sloon Zittesje tradiese
  Is al auwd hie- wòs geer dat?

Veer sjmiete hie al heel get jaore
  De achëntwintigste maol vandaag
En veer höbbe det ouch ummer
  Gaer gedaon, es ich zègge maag

Es geer vanmiddig in de bènnesjtad
  Van òs vangt ein appelsien
Den ligk det zeker aan òs sjmiete
  Want veer kènne det! Heel fien!

Sukses mit vange en de kòmplemènte
  Van Teioo en zien appelsienevrunj.

Dit gedichske haet oppe kabelgezet gesjtange op 20 fibberwari (vastelaovesdaensdig) 1996.

Zitterd, 28 fibberwarie 1995

Vandaag op vastelaoves-daensdig
  In Zitterd al lang ein tradiese
Waere appelsiene gesjmete
  En waal mit väöl ambiese.

Al in neugeteen-neugeënsestig
  Zösentwintig jaor gelee
Zeen veer begoosj mit sjmiete
  Volges mich loug doe de sjnee.

Veer zeen mit zeve troewe sjmietesj
  Ich sjtèlde ze uch al èns veur
Dit doon ich noe den ouch neit mee
  Noe mót geer ze mer kènne heur

Vanmiddig gaon veer weiër aan’m
  In Zitterd in de bènnesjtad
Det weurd weiër ein sjoon sjpektakel
  Zeker weite- ich zegk uch dat.

Teioo

Appelsiene- appelsiene.

Dit gedichske haet oppe kabelgezet gesjtange op 28 fibberwarie (vastelaovesdaensdig) 1995.

Zitterd, vastelaoves-daensdig 15 fibberwarie 1994

Jo ( Haarie) in de appelsiene-vut.

Om das doe zo erg höbs aangedrónge
  Höb ich toch weiër veur dich gedich
En ein dènk weit ich heel zeker
  Das doe dich hieöp höbs gesjpich.

Al vief-en-twintig jaore sjmits doe
  Vastelaoves-daensdig in de sjtad
Nao de jeug mit appelsiene
  Leif luuj van Zitterd- wós geer dat?

Ich wil uch toch aeve vertèlle
  Wiej det doe óntsjtange is
In neugeteenhonderd-neugeënsestig
  Den wit geer det oug- besjlis.

Jo dae koum doe bie ós vrieje
  Bie mien zösterke Sophie
Dem kènt geer toch allemaole
  Det is oug vandaag der bie.

Jo zag “ich möt dich get vertèlle
  Het geit in Zitterd niet zo goud
Mit ’t appelsiene-sjmiete
  Het zit daomit toch waal fout.”

Dao weurd bekans niet mee gesjmete
  Zo geit de tradiese koch kepot
Det moug toch zeker niet gebeure
  Det is toch zeker al te zot.

Witse waat veer mötte doon
  Zag hae doe taenge mich
Veer gaon zelf toch sjmiete
  Ein paar angere- doe en ich.

Eine daomino woord veur ós gemaak
  Dae heurde dao oug bie
En eine zak van gerdiene-sjtóf
  Daomit waore veer doe bliej.

Appelsiene woorte doe gekoch
  Biej van Nispe zoës ich weit
Want zónger die oranje eppelkes
  Geit ’t appelsiene-sjmiete niet.

Doe zeen veer begoosj mit sjmiete
  Gans veurzichtig in ’t begin
Mèr gauw hauw veer de sjlaag te pakke
  Veer krege ech daoïn doe zin.

Zo is oos appelsiene-klub óntsjtange
  Gelee al viefentwintig jaor
Geer kènt ’t zeen aan oos medaajes
  Kiek mer èns- ’t is ech waor.

Nao dees trökblik in de historie
  Waat ich gaer toch höb gedaon
Wil ich uch noe gaon vertèlle
  Woveur ich hie veur uch sjtaon

Jo haet te kènne noe gegaeve
  Hae zaet “Ich höb niet mee de fut”
Hae sjeit oet mit aktief sjmiete
  Hae wilt in de appelsiene-vut.

Lang höb veer hieëuver vergaderd
  Eine aovend en ein nach
Mer veer zeen der oetgekömme
  Veer höbbe ós get sjoons bedach.

Veer beije dich bie deze den
  ’t ereveurzittersjap aan
en veer verwachte das doe jao zaes
  wae zou niet wille- zo’n sjoon baan.

Mer veur das doe hieöp jao zaes
  Zegk ich “Jo bedènk dich goud
Dees funksie haet rechte mer oug plichte
  Zaes doe jao den höbs doe sjoud.

Es doe jao zaes wilt det zegke
  Das doe altied bös verplich
Óm daensdig mit appelsiene-sjmiete
  Hie te zeen- det zegk ich dich.

Nae ich höb noe gein medaaje
  Es dekorasie mitgebrach
Veer höbbe get angesj besjlaote
  Veer höbbe get angesj bedach.

De appelsiene-klup medaaje
  Houfs doe niet te gaeve trök
Is det noe gein sjoon verrasjing
  Höbs doe hiemit niet väöl gelök.

Mer ich höb nog ein anger verrasjing
  Die hauws doe zeker niet verwach
Nog aeve gedöldj mös doe höbbe
  Den wits doe waat ich hauw bedach.

Ich gaon dit gedich besjloete
  Ich haop doe vónjs ’t niet te lank
Mer wie’ doe dit oug zals vènje
  ’t hauw eine vrundjelökke klank.

Veer gaon ós nog eine drènke
  Sjödde òs eine oppe lamp
En veur die viefëntwintig jaore
  Zegk veer den oug “Jo bedank”

Teioo

Zitterd, 23 fibberwarie 1993

Appelesiene- appelesiene
  Vandaag sjmiete veer weiër heur.
Veer zeen mit ach echte sjmietesj
  Ich sjtel ze uch effe veur.

Luc det is ooze troewste,
  Henk det is de minsj van de bank.
Paul det is den de meister,
  En Leon is van de zank.

Luc twee det is hie ein raodslid,
  Roel dae is ens prins gewaes.
Jo det is ooze Harie,
  En ich bön Thei- aangenaam – belaef.

Veer besjtaon veiërentwintig jaore,
  Leif luuj van Zitterd – wós geer dat?
Es geer ós den wilt zeen sjmiete,
  Kóm vandaag den nao de sjtad!

Teioo

Zitterd, 23 fibberwarie 1993

Appelsieneklup,

Al veiër-en-twintig jaor besjtaon veer
  Leif luuj van Zitterd- wós geer dat?
Dat veer al zo väöl jaore
  Sjmiete hie al in de sjtad.

Nae veer sjmiete niet mit sjtein
  Of mit brigge door ein roet
Veer sjmiete mit appelsiene
  Vastelaoves-daensdig nao eine poet.

En óm uch te laote weite
  Wae allemaol in die klub zit
Zal ich ze uch veur gaon sjtèlle
  ’t zeen jonges mit väöl pit.

Es eesjte nuim ich den de langste
  En de troewste van oos sjtel
Luc dreeg hèisje bie ’t sjmiete
  Woo hae den mit sjmit- heel hel.

Es tweede wil ich Henk den nuime
  Dae zit de ganse daag oppe bank
Hae zal zitvleisj daovan kriege
  Mèr häöm vilt de tied niet lank.

Es driede nuim ich meister Paul
  Dae trap gaer taenge de bal
’t is eine gouwe sjpits
  Cris Decker- wós doe det al?

Es veiërde nuim ich den Luc
  Raodslid ein veurnaam taak
Dae veur ós jaore gelee
  De medaajes haet gemaak.

Es viefde nuim ich den Roel
  Ex prins dét wit geer gewis
Ich bön benuujt of hae daensdig
  De medaaje niet vergaete is

Es zösde sjtel ich veur Leon
  « ‘t Jongetje » zoës me zaet
det is degeine dae van Zitterd
  de meiste luuj ónger zich haet.

En es zevende Jo - Haarie veur ós
  Dae vierde vurg jaor mit gejuich
Mit ein sjoon fees ziene Abraham
  Ein en zeventig daag te vruig.

Ich höb der uch zeeve veurgesjtèld
  De achtste det bön ich
Van veure is miene naam Teioo
  En ich maakte dit gedich.

Appelsiene- appelsiene.

Teioo