Leede en Besjtuur

Nuuj leede koume biej, mer dao waore d`r ouch die get angesj ginge doon. 
Dit zeen alle leede en oudleede van de Appelsieneklup:

3 Theo "Teioo", "Pavke" Vahsen
Teioo Vahsen woont al jaore in de bènnesjtad van Zitterd en is 't ènnigste euvergebleve aktief lid van de appelsieneklup vanaaf 1969! Saer 1994 is hae ouch veurzitter. Bekènd van radio en tillevisie, is hae weltberuimp in de Zittesje Appelsienesjmietesj-branche.

        Paul Laudy
Paul laudy waor lid van 't eesjte oer, en ummer ein heel troe lid van òs Appelsieneklup. In 1980 is hae helaas euverlede.

Luc "Lange Luc", "Luuc van `t Park", "Kesjke" Laudy
Lange Luc Laudy is taengeweurdig bieleman en nog vaandraeger biej de Paek, en nog altied lid van òs vereiniging. Hae is ein aantal jaor neit d'rbie gewaes, mer gelökkig sjmit hae noe weier mit!

Luc "Kleine Luc", "Luc van de Sjtaase", "Rooie Luc" Laudy
Rooie Luc (vanwaege zien polletieke gezindheid) haet in 1988 oos appelsienemedaaje òntwòrpe en gemaak, die veer nog ummer greutsj drage. Hae haet zich aafgemeljd 1998 omdat hae bie 't Hermenieke gòng. Zien Appelsienemaskes van Keuningin Beatrix en Daeke Janssen waore heel bekende en väöl-bewònjerde kreaties in Zitterd.

Peter Verblakt
Peter Verblakt is jaorelangk lid gewaes. Helaas sjtòrf hae in 1993.

Leon " 't Jongetje" Tonglet
't Jongetje Tonglet is ouch al heel lang lid. Hae is ouch bieleman, en saer kort Suis van de kirke van de bènnesjtad-Parochie. Zien beroup is dodegraever.

1 Roel "Prins Roel de Tweede" Cobben
Prins Roel Cobben waor es puber al lid van oos appelsieneklup. Roel is in 1988 Prins gewaes van de Marotte. Veer es Appelsieneklup höbbe häöm doe same mit väöl angere gebrach op de insjtalatiezitting. Es atribute hauwe veer doe verkesblaoze, laeverwoosj en paeperkouk en natuurlik appelsiene. Vanwaege zien wirkzaamhede in de horeka is Roel al jaore neit mee aktief sjmieter. Zien auwesj Ellie en Zef waore oetbatesj van Cafè-restaurant `t Zölderke, wao veer heel get jaore appelsiene höbbe gesjmete oet de vinster. Roel haet de eesjte medaaaje van de Appelsieneklup gekrege. Dees medaaje zuut get angesj oet es die angere: D'r sjteit "Prins Roel II" op.

        Ed Palmaers
Ed Palmaers is ouch eine van de eesjte jaore. Hae is nao Mestreich verhoesd en haet daonao neit mee mitgesjmete.

2 Jo "Haarie" Laudy
Haarie Laudy is eine van de oprichtesj van oos appelsieneklup en waor jaorelank ouch veurzitter. Saer 1994 is hae ere-veurzitter van oos Appelsieneklup. Haarie sjmit neit mee mit mer is waal erelid van oos Appelsieneklup.

10 Sjra Derrez
Sjra Derrez haet in 1998 oos medaaje gekrege. Vanwaege drökke werkzaamhede (chauffeur van de prins en bieleman) is hae neit mee aktief es sjmieter.

11 Theo Wijman
Theo Wijman is saer 2000 lid van oos appelsieneklup. Hae haet doe de èlfde medaaje van oos appelsieneklup gekrege.

Henk Wetzels
Henk Wetzels is ouch eine sjmieter van de eesjte oere. Hae zit väöl oppe bank (woo hae ouch wirk) en is sjatmeister van drie parochies in Zitterd. Henk haet zich aafgemeldj in 1998.

Paul "Puil" Jessen
Puil Jessen is al heel lang lid van oos vereiniging en is woordvuierder van de Appelsieneklup (en manager bie media-optraeës). Hae löp al jaore mit appelsienesjmiete ònger ein sjemerlampekap. Mer hae löp in de duuster, want de lamp brent neit.

13 Manni "Mister Money" Niederberger
Manni Niederberger is uch al jaore ein troewe sjmieter. Hae haet de medaaje gekrege in 2003. Manni is wageboewer van de buurt Èngelekampsjtraot.

12 Dick van de Berg
Dick van de Berg waor vanaaf 2001 lid van òs appelsieneklup. Hae is helaas gesjtòrve in december 2005.

16 Paul " 't Witje" de Wit
Paul haet in 2006 de eesjte maol mit òs gesjmete. Ein jaor later haet hae ouch de prouve die hae moosj aaflèGGe goud doorsjtange, woodoor hae opgenòmme is in oos Appelsieneklup. Hae haet de zesteende appelsiene-medaaje van oos vereiniging òmgehange gekrege.

15 Theo "Theophil" Tummers
Theophil is eine brouwer van oos lid Teun Tummers. Hae haet in 2006 veur de eesjte maol mitgedaon, en hae waor enthousiast. Ein jaor later waor hae ouch weiër present en nao de prouve aafgelag te höbbe, haet hae de viefteende appelsienemedaaje òmgehange gekrege, woodoor hae lid is van oos appelsieneklup.

17 Tino Hernaus
Tino haet in 2010 op vastelaovesdaensdig de appelsienemedaaje òmgehange gekrege woo hae erg greutsj op is. Deze goudlachse sjnaak is sjus eine poeet mit zien fien woordsjpelinge. Actief is Tino es sjurielid van de Groote Optoch en van `t jaorlikse alternatief sjöttefees.

18 Jo "'t awdste vel" Heesackers
Ouch Jo haet op vastelaovesdaensdigs 2010 de appelsienemedaaje òmgehange gekrege. Mit ziene dreuge humor krig hae jederein aan 't lache. Dees amateurtoneelsjpeler in röste is aktief es waageboeuwer bie zien buurt Èngelekampsjtraot.