De Appelsieneklup
Wie is de Appelsieneklup òntsjtange en wat deit ze presies? Geer lees 't hie!
|
Zo begoosj 't
De appelsieneklup is óntsjtange in 1969.
Òmdat in dae tied neit zo väöl appelsienesjmietesj waore, koum Jo Laudy mit `t veursjtèl òm same appelsiene te gaon sjmiete.
Teioo's zöstesj maakde daomino`s, en neede appelsiene zek van gerdienesjtòf, womit veer noe al jaore herkènd waere es veer sjmiete.
Op vastelaovesdaensdig 16 fibberwarie 1969, höbbe veer veur 't eesj appelsiene gesjmete, in de sjnee die toen erg hoog loug. Op dae daag is de Appelsieneklup offisjeel opgerich.
Dae eesjte keer in 1969, dat veer gónge appelsienesjmiete waor in `t Patronaat in Ophaove biej Tony Verblakt, begoosjte veer òm
2.11 oere.
Veuraaf woort geldj biejeingelag en get kiste appelsiene besjtèld biej Van Nispen.
`t Waor toch effe wènne om appelsiene te sjmiete in `t Patronaat en de sjmietesj waore nog neit erg ervaare.
Jo Laudy sjmeet al drek ein lamp kepot. Dat waor goud lache en `t ies waor al drek gebraoke.
In dat zellèfde jaor zeen veer ouch in de bènnesjtad van Zitterd gaon sjmiete.
't Waor ein geweldige ervaring en sjmaakde nao mee.
Veer zeen greutsj òm es vereiniging al jaore present te zeen bie 't Appelsienesjmiete op vastelaovesdaensdig.
|
Doelsjtèlling
De Appelsieneklup besjteit oet ein aantal mansluuj, die zich bieëin höbbe gepak, òm 't jaorlikse tradisjoneel Appelsienesjmiete op vastelaoves-daensdig in de bènnesjtad van Zitterd te sjtimeleiëre. Al jaore zörge veer d'rveur dat de kènjer in de Zittesje bènnesjtad eine leuke middig höbbe en mit ein (of twee, of drie, of...) gezònj versjnapering nao hoes gaon.
|
Lokasies
Veer höbbe uiteraard al op väöl lokasies appelsiene gesjmete.
In chronologische volgorde:
Patronaat in Ophaove
Hie zeen veer in 1969 begoosj en höbbe veer oos eesjte appelsien gesjmete nao oos oprichting. Helaas besjteit 't Patronaat neit mee, 't geboew is gesjloop.
`t Zölderke
Ellie en Zef Cobben, de auwesj van oos lid Roel "Prins Roel de Tweede" Cobben, waore oetbatesj van dit Kaffee-restaurant, woo veer heel get jaore appelsiene höbbe gesjmete oet de
vinster.
Het waor dao ummer heel erg gezèllig.
Ein naodeil waor waal, dat dae boum veur 't pandj òs ummer in de waeg sjtóng mit sjmiete.
't Zölderke is taegeweurdig aaf en toe eine winkel.
De boum sjteit d`r nog!
Lunsjroom Schrage
Hie höbbe veer jaorelank vanaaf `t balkòn oppe houk gesjmete.
Veer zeen altied gasvrie òntvange door Guus en Marlie en höbbe 't heel gezèllig gehad.
Hiebiej wille veer mit respek eigenaer Guus Schrage nuime.
Hae is helaas te vruig gesjtórve, in 1995
Hotel de Limbourg
Saer 2000 is dit de toesbasis van de Appelsieneklup.
|
1991
In 1991 is de Vastelaovend neit doorgegange vanwaege de Golfkreich in 't Midde-Ooste.
Daodoor is doe ouch 't offissieel Appelsienesjmiete aafgelas.
Ich maag uch bie deze verklappe dat veer mit ein paar sjmietesj toch sjtikkem ein appelsien of twee höbbe gesjmete,
zodat veer kènne zègge, dat det jaor toch appelsiene zeen gesjmete!!!
|
" 't Ligk neit aan 't vange, mer aan 't sjmiete"
Dit motto is jaore gelee òntsjtange bie...'t Appelsienesjmiete.
Veer waore doe bezig, bie ein lekker pötje beiër, euver de kuns van 't sjmiete te filesofeiere. Op ein gegaeve moment zaet veurzitter Teioo
"'t Ligk neit aan 't vange, mer aan 't sjmiete". Hae wou daomit zègge dat, es ein appelsien goud is gesjmete, 't vange geine kuns meer is!
De euverige leede waore effe sjtil van zoväöl wiesheid.
Doe is dees oetsjpraok ter plaatsje mit ein euverweldigende meerderheid van 111% van de sjtömme, es motto van òs Appelsieneklup aangenòmme.
|
